Che d’è sta malatia ca mm’è venuta,
stu fatto ca nun voglio vedè ‘a ggente…
Chi m’ ‘ ha mmiscata, chi me l’ha mettuta
sta freva ncuollo ca me dà turmiente?

Chille ca sule parlano
se dice cà so’ pazze o so’ fissate,
so’ chilli tipi c’hanno perz’ ‘a bussola
pe’ na femmena, o stanno disperate.

Io tengo ‘e solde, so’ vuluto bbene…
me lament’ ‘e che ccosa?  E bà nci ‘o spia!
Chi m’ ‘ha mmiscata chesta malatia,
sta ffreva ncuollo chi me l’ha mettuta?

Io parlo sulo, crideme,
mmiez’a na folla ‘e ggente
ca nun veco; sento parlà e risponnere
dicenno sempe ‘e stesse fessarie…
Ma fosse chesta ‘a freva e ‘a malatia?

E. De Filippo, 1983